అర్ధరాత్రి హాస్టల్‌లో ఉద్రిక్తత.. విద్యార్థులపై లాఠీచార్జ్ ఆరోపణలు

హైదరాబాద్‌లోని పేట్ బషీరాబాద్ పోలీస్ స్టేషన్ పరిధిలో ఉన్న మైసమ్మగూడలో అర్ధరాత్రి ఉద్రిక్తత చోటుచేసుకుంది. ప్రైవేట్ హాస్టల్‌లో ఉన్న కొంతమంది విద్యార్థులు మద్యం సేవించి సెక్యూరిటీ గార్డుతో గొడవకు దిగినట్లు సమాచారం. ఈ విషయం తెలుసుకున్న పోలీసులు అక్కడికి చేరుకుని పరిస్థితిని అదుపులోకి తెచ్చేందుకు ప్రయత్నించారు. అయితే పోలీసులు హాస్టల్ గదుల్లోకి దూరి విద్యార్థులపై లాఠీచార్జ్ చేశారని విద్యార్థులు ఆరోపిస్తున్నారు. ఈ ఘటనలో పోలీసులు దురుసుగా ప్రవర్తించారని, మాట్లాడే అవకాశం కూడా ఇవ్వలేదని విద్యార్థులు చెబుతున్నారు. ఘటనకు సంబంధించిన వీడియోలు సోషల్ మీడియాలో వైరల్ కావడంతో విద్యార్థి వర్గాల్లో ఆగ్రహం వ్యక్తమవుతోంది. పోలీసుల ప్రకారం మాత్రం పరిస్థితి అదుపు తప్పడంతోనే బలప్రయోగం చేయాల్సి వచ్చిందని చెప్పారు.