వరంగల్​లో అంతర్జాతీయ క్రికెట్ స్టేడియం

వరంగల్‌లో అంతర్జాతీయ స్థాయి క్రికెట్ స్టేడియం నిర్మాణానికి తెలంగాణ ప్రభుత్వం గ్రీన్ సిగ్నల్ ఇచ్చింది. సీఎం రేవంత్ రెడ్డి ఆదేశాలతో ఫైల్​ ముందుకు కదిలింది. హైదరాబాద్ తర్వాత రాష్ట్రంలో క్రీడా మౌలిక వసతుల విస్తరణలో భాగంగా వరంగల్ నగరంలో అంతర్జాతీయ ప్రమాణాలతో క్రికెట్ స్టేడియం నిర్మించేందుకు తెలంగాణ ప్రభుత్వం చర్యలు ప్రారంభించింది. ధర్మసాగర్ మండలం ఉనికిచెర్ల గ్రామ శివారులో జాతీయ రహదారి 163కి ఆనుకుని ఉన్న 30 ఎకరాల పట్టణాభివృద్థి సంస్థ భూమిని దీనికోసం గుర్తించారు. ఈ ప్రతిపాదనపై ముఖ్యమంత్రి సానుకూలంగా స్పందించి సంబంధిత అధికారులకు ఆదేశాలు జారీ చేశారు. ప్రస్తుతం ఫైల్ ప్రభుత్వ పరిశీలనలో ఉంది. త్వరలోనే అనుమతులు లభించే అవకాశం ఉందని ప్రజాప్రతినిధులు వెల్లడించారు.