సీఐడీ కస్డడీలో రఘురామను అడిగిన ప్రశ్నలేంటి..? విచారణలో తడబడిన సునీల్ నాయక్..

ఏపీ అసెంబ్లీ డిప్యూటీ స్పీకర్ రఘురామకృష్ణరాజు కస్టోడియల్ టార్చర్ కేసులో ఐపీఎస్ అధికారి సునీల్ నాయక్‌ను పోలీసులు 6వ రోజు కీలక అంశాలపై ప్రశ్నించారు. ముఖ్యంగా రఘురామను కస్టడీలోకి తీసుకున్న తర్వాత జరిగిన పరిణామాలపై విచారణ సాగింది. కస్టడీలో రఘురామను ఎక్కడ ఉంచారు? ఎవరెవరు విచారించారు? ఏఏ అంశాలపై ప్రశ్నించారు? అనే విషయాలపై సునీల్ నాయక్‌ను ప్రశ్నించినట్లు తెలిసింది. ఆ సమయంలో విధుల్లో ఉన్న ఇతర పోలీసు అధికారుల పాత్రపై కూడా వివరాలు సేకరించారు. దీంతో సరైన సమాధానాలు చెప్పలేక సునీల్ నాయక్ తడబడినట్లు విశ్వసనీయ సమాచారం. మరోవైపు దర్యాప్తు బృందం వద్ద ఉన్న ఆధారాలు, రికార్డులతో సునీల్ నాయక్ ఇచ్చిన సమాధానాలను పోల్చి పరిశీలించారు. సునీల్ నాయక్ నుంచి రాబట్టిన సమాచారం అధారంగా త్వరలో మరికొందరు ముద్దాయిల్ని విచారించే అవకాశం ఉంది.