రాజేంద్ర ప్రసాద్‌పై విశాల్ సీరియస్

నటకిరీటి రాజేంద్ర ప్రసాద్ ఇటీవల చేసిన కొన్ని వ్యాఖ్యలు దక్షిణాది సినీ పరిశ్రమలో చిచ్చు రేపాయి. ‘కత్తి కాంతారావు జాతీయ అవార్డు’ ప్రదానోత్సవంలో పాల్గొన్న ఆయన, అలనాటి నటుడు కాంతారావు గొప్పతనాన్ని వివరిస్తూ.. మాజీ ముఖ్యమంత్రి, దిగ్గజ నటుడు ఎం.జి. రామచంద్రన్ (MGR) పై అనుచిత వ్యాఖ్యలు చేశారు. కాంతారావు పేరు చెబితేనే ఎంజీఆర్ భయపడేవారని, ఆ సందర్భంలో ఆయన ప్రవర్తన, వాడిన పదజాలం ఇప్పుడు పెద్ద వివాదానికి దారితీసింది. వివాదంపై నటుడు, నడిగర్ సంఘం కార్యదర్శి విశాల్ సోషల్ మీడియా వేదికగా తీవ్రంగా స్పందించారు. రాజేంద్ర ప్రసాద్ లాంటి గౌరవనీయమైన సీనియర్ నటుడు, కోట్లాది మంది ఆరాధ్య దైవమైన ఎంజీఆర్ గారిని అంత తక్కువ చేసి మాట్లాడటం తనను షాక్‌కు గురిచేసిందని ఆయన ఆవేదన వ్యక్తం చేశారు. ఒక మహానుభావుడిని పొగిడేందుకు మరొక మహానుభావుడిని కించపరచడం సరైన పద్ధతి కాదని విశాల్ హితవు పలికారు.