టీచర్ల రిటైర్మెంట్ వయసు పెంపు

ఏపీలోని ప్రభుత్వ రంగ సంస్థలు (PSU), గురుకుల సొసైటీ పాఠశాలల్లో పనిచేస్తున్న ఉద్యోగులకు రాష్ట్ర ప్రభుత్వం తీపి కబురు అందించేందుకు సిద్ధమైంది. వీరి పదవీ విరమణ వయసును ప్రస్తుతం ఉన్న 60 ఏళ్ల నుండి 62 ఏళ్లకు పెంచే ప్రతిపాదనకు ప్రభుత్వం సానుకూలంగా ఉన్నట్లు తెలుస్తోంది. ఈ అంశంపై అధ్యయనం చేసేందుకు ప్రభుత్వం ఏర్పాటు చేసిన కేబినెట్ సబ్ కమిటీ ఇటీవల సమావేశమైంది. ఆర్థిక మంత్రి పయ్యావుల కేశవ్, విద్యాశాఖ మంత్రి నారా లోకేశ్‌, పురపాలక శాఖ మంత్రి నారాయణలతో కూడిన ఈ కమిటీ పదవీ విరమణ వయసు పెంపునకు సూత్రప్రాయంగా అంగీకరించినట్లు తెలిసింది. ఈ నిర్ణయం అమలులోకి వస్తే రాష్ట్రవ్యాప్తంగా వివిధ కార్పొరేషన్లు, 9, 10 షెడ్యూల్ సంస్థల్లో పనిచేస్తున్న సుమారు 8,500 మంది ఉద్యోగులకు నేరుగా ప్రయోజనం చేకూరనుంది.