నపుంసకుడని దాచిపెట్టి పెళ్లి.. పోలీసులకు వివాహిత ఫిర్యాదు

పెళ్లై మూడు నెలలు అయినా సంసారం చేయకపోవడంతో భర్త నపుంసకుడని తెలిసిందని ఓ నవవధువు విజయవాడ గవర్నర్‌పేట పోలీసులకు ఫిర్యాదు చేసింది. నంద్యాలకు చెందిన యువతి పంచాయతీ సెక్రటరీగా పనిచేస్తోంది. ఆమెకు గతేడాది డిసెంబరు 26న కడప జిల్లాకు చెందిన యువకుడితో నంద్యాలలో ముస్లిం సంప్రదాయం ప్రకారం వివాహం జరిగింది. పెళ్లికి ముందు రూ.15 లక్షల కట్నం, దుస్తుల కోసం మరో రూ.లక్ష ఇచ్చారు. పెళ్లి రోజున ఐదు తులాల బంగారు ఆభరణాలు కూడా ఇచ్చారు. అయితే భర్త రాత్రిళ్లు ఇంటికి రాకుండా సంసారం చేయకుండా తప్పించుకుంటుండడంతో యువతి నిలదీసింది. దీంతో భర్త, అత్తమామలు చంపేస్తామని బెదిరించి ఇంటి నుంచి పంపించారని ఆమె ఫిర్యాదులో పేర్కొంది. బాధితురాలి ఫిర్యాదు మేరకు గవర్నర్‌పేట పోలీసులు కేసు నమోదు చేసి దర్యాప్తు చేస్తున్నారు.